Updi Ko Bala Sulay sa Ulan!

Kun gusto mo mabal-an
kun ano nga klase nga pagtipig
ang gina-buhat ko sa sining
balatyagon ko sa imo,

lakat ka bala upod sa akon
kun mag-ulan sang mabaskog,

indi ko ya magsinggit kag
magdasig-dasig lakat para mangita
sang malapit nga pasilungan

indi ta man ka pagbaya-an
kag mag-una ako lakat
para indi guid ako ma-umog sing basa

indi ta guid ka pag-guyuron
para magdalagan sing madasig
asta maka-abot kita sa aton kaladtuan

indi

pamati-an ko lang ang tiyempo sang
imo pagtikang kag sundon ko lang
ang ritmo sini

huo

malakat lang ako sing mahipos
upod sa imo,

pabay-an ko lang nga mag-alagay
ang ulan sa bilog ko nga lawas

ang importante, ara lang ko galakat
sa kilid mo

kag  ang maayo sini kay
bal-an ko nga daw malawig-lawig
ini nga laktanay...

teh, gusto mo guid mabal-an?

lakat ta 'to bala kag magpa-ulan.