Kay Man

...Kay man may mga dalan nga makapahanumdum sa akon
sang mga adlaw nga nagalakat  kita sa idalom sang kati-al
sang init sa udtong adlaw, pero daw wala ka lang kabatyag
sang kagin-ot ukon sang pagtulo sang imo balhas kay man ang
imo paminsaron ara sa imo kamot nga hugot nga naga-kapot
sa akon, kag sang akon buhok nga ginahampas
sang mainit nga dapya sang hangin padulong sa imo nga abaga

...Kay man may mga tanom nga  nagapahanumdum
man sa akon sa kun paano ang imo mga kamot hugot nga
naga-kapot sa pisaw agud bungkalon ang lupa sa palibot
sang ugat kay siling mo pa, "para makaginhawa man ang mga tanom",
kag kun paano, ang ini man nga mga matig-a nga palad, nga ginpatig-a sang
pagtipig mo sa imo mga bonsai, cactus kag orchids
amat-amat kag mahinay nga nagapikpik sa akon kapoy
nga tiil 'asta ako makatulog sing mahamuok

...Kay man may mga hinugyaw sang mga bata nga
daw nagapanawag sa akon nga magbalikid kay daw ginahambal
sang akon paminsaron nga daw imo guid nga tingug ang akon nabati-an,
daw imo nga tingug nga nagakadlaw upod sa akon kag
nagapanghagad nga "lakat ta bala day, updi ko 'to ay"
kag kun paano nga ang baho sang nagsamo nga init kag balhas
nagpabalik sa akon paminsaron sa mga sirum nga
nagapa-uli ka sa balay halin sa taguri mo nga paghampang sa bangi

...Kay man ang kahumot sang mga ginabaligya nga streetfoods
sa kilid sang Chatchai Road, ang alagyan pakadto sa amon apartment
nagapahanumdum sa akon sang mga hapon nga naga-tambay kita
sa kilid sang plasa kag naga-pamasaw sang fishballs kag kikiam
nga may kaupod pa nga coke kag pagkatapos sina, masalakit
ang aton tiyan kag indi kita kabalo kun tungod ini sa sobra nga kabusog
ukon sa sobra nga hangin sa wala pugong-pugong naton nga pagkinadlaw

...Kay man kun kaisa gakalipat ako nga malayo gali ako sa balay

...Kay man may mga tini-on nga indi ko mapinsaran nga sa abroad gali ako

...Kay man tungod sang kamatuoran nga gakalipat ako nga naga-isahanon ako,
 malayo, sa abroad, may mga tini-on nga makibot na lang ako
 kun magsulod sa paminsaron ko nga
"San-o na 'to siya mapuli diri halin Bacolod man?",
 "Ipahilot ko ayhan ang kapoy ko nga tiil kay nanay?",
"Ay daw tingug man 'to sang utod ko",
"Hala, kahamot sang ginbaligya ni manong o, kaso wala na ko upod magkaon",


...kay man sa pirmi ko nga pagkalipat
kun kaisa gasulod na lang sa paminsaron ko ang ini nga mga tinaga,
Maka-abot ayhan ako balik sa balay,
kun lakton ko lang 'ni?