Waay Ko 'it Ma-obra...

...Actually, may lima pa ko ka lesson plan nga tarapuson kaso, ginapanumdum ko, may weekend pa ko kag matapos ko man daa sa isa lang ka purungku-an.

...Actually pa guid, may mga grades pa ko nga inug proof-read, pero pwede pa man daa karun sa gab-i antes takun magturog. Pira guid da man? 30 minutes? 15 minutes?

So, pagkatapos ko encode kag solve ka grades ka mga bata ko (Waay pa ko asawa, waay pa gani nobyo pero damu na mga bata ko. Baw ilam dulang!) kagina mga alas diyes sa aga asta dukar0n nga ala-una y media, waay ko it na-obra kundi panimungko, pamukad facebook kag pang-basa ka status updates ka mga kilala ko kag mga (long  forgotten?) friends asta nag-rilingin ulo ko. Indi ko dun daad pag-ihamabal pay daw may gatulod guid kanakun. Ginapabugal ko guid nga mga isa dun ko ka semana nga waay ga-stalk sa account ka to be forgotten nga tawo. Mayad guid katama.

Kay waay dun man ako ma-isip nga obrahon kag gina-tamad ako magtapos ka mga academic works ko, na-isipan ko dulang magsulat ka entry dya sa blog ko kag i-try nga gamiton ya Kiniray-a hay daw mga irisipon lang guid ya mga write-ups ko sa karay-a. Na, kundi gauran kag garagumo 'di ka mga karay-a nga words.

Balik sa ginhambal ko nga waay ako 'it ma-obra. Actually, gatampok ang urubrahon ko. Kun normal ang dalagan ka paminsaron ko, gin-tapos ko anay obra dya sanda tanan antes mang-labay-labay. Kun ka-isa gani pamatyagan ko ya panimu-ot ko indi bagay pang-maestra. Insa? Hay daw kaduro lang ka rason nga amat-amat ko dulang na realize sa sulod ka apat ka tu-ig nga naga-tudlo ako. Pay pabay-i dulang daa ah. Insa ya sukatan ka mayad nga maestra amu ya pag-angkon ka convential nga panimu-ot? Indi man guro ah. Kaduro ayhan ka mga kilala ko nga mga maestra nga unconvential manumdum, radical pa gani ang iban 'pay mahambal ko nga sa pagtudlo, waay guid ako 'it may ma-komentar.

Gatampok ya urubrahon ko, tuod. Pay feeling ko daw kataw-tawhay kanakon dukar-on. Siguro kay sagad dun ko mag-obra kun mas-rapit dulang ya deadline ukon gina-padali ako.

Gatampok ya urubrahon ko 'pay pamtyagan ko daw waay ako 'it ma-obra, ukon indi lang takun kama-an kun diin ma-umpisa.

 Ka-urugot ah. Na, daa. Sakmala ya garagumo nga karay-a.